هەولێر ئەی شارەکەی شیرین بەهارەم
هۆنراوی ناڵە حەسەن 
هەستە هەولێر لەم کەرنەڤالی ڕاسان و لەم ڕەشبەڵەکی ژیان و لەم دایکبوونەوەیەدا
دەستی دەستە خوشکە چاو گەشەکەی سلێمانیت بگرە
دەستی شار و شارۆچکەکان و لادێ و دێهاتەکانت بگرە
هەستە هەولێر
دەسماڵەکەت بەدەست بگرە
عاشقە خوێن گەرمەکان و سەرچۆپیە دڵ پڕ لە هیواکان
لە گۆڕەپان ولەسەر شەقام چاوەڕێتن
رەشبەڵەکە رەشبەڵەک، رەشبەلەکی ئازادییە
رەشبەڵەکی نان و گوڵ وروناکیە
هەستە هەولێر
ئەو شارەکەی سەردەشت عوسمانم
شارەکەی عبدلخالق معروفم
ئەی شارەکەی راپەڕین و شارەکەی هۆلاکۆ بەزێنم
ئەی شارەکەی شیرن بەهارەم
شارەکەی کەڵە کوڕان و ئاسکە کچانم
رابە هەولێر
ئەی شارەکەی لانەواز و بێ سەرپەرشتانم
رەشبەڵەکە و رەشبەڵەک ،رەشبەلەکی ئازادییە
رەشبەڵەکی نان و گوڵ وروناکیە
هەستە هەولێر
ئەی شارەکەی هەژارانم
ئەی مەنزڵگەی پڕ بەرائەت
شارە دێرینەکەی شەهیدانم
ئەی شارەکەی سەری رەش و
هاوینە هەوارە جوانەکانم
ئەی هەولێرم
سلێمانت دەستی بۆت راگرتوە
کرکوک دەستی بۆ راگرتوە
هەڵەبجە دەستی بۆت راگرتوە
گەرمیان و دەربەندیخان ،خانەقین و هەورامان دەستیان بۆت راگرتوە
دەتۆش هەستە دەستەکانت بۆ دهۆک و زاخۆی دەلالم ، ئاکرێ و ئامێدی جوانم
هەموو شوێنەکانیتری کوردستانم
دەی گشت پێکەوە زەماوەندەکەتان بگێڕن
رەشبەڵەکە رەشبەڵەک، رەشبەڵەکی ئازادییە
رەشبەڵەکی ئازادییە ، رەشبەڵەکی نان و گوڵ و روناکیە
هەستە هەولێر
لەنێو دڵی گۆرەپان و لەئامێزی قەڵایە سەربەرزەکەت
بەستە و سەمفۆنیای ژیانێکی نوێ بچڕە
کوڕ و کچانی دڵ پڕ لە عەشقت بێنە لەرزین و
لاوک و حەیرانی سەرفرازیت بچڕە
هەستە هەولێرم
ببە بە گەردەلول ورەشاب و تۆفان
رایان ماڵە کۆشک و سەرای مشەخۆر و گەندەڵەکان
رایان ماڵە تاج و تەختی گشت خوداکان
دەنگ و زایەڵەی ئەم هەستانەت بگەیەنە بەگوێی جیهان
رەشبەڵەکە رەشبەڵەک، رەشبەڵەکی ئازادییە
رەشبەڵەکی ئازادییە ، رەشبەڵەکی نان و گوڵ و روناکیە
*** *** ***