سەردەشت کچەکەی بارزانی ناوێت

جەلال ھۆرێنی:

ئەو نامەی سەردەشت ، نوسیبوی بۆ سەرۆکی ئەوکاتە، بۆ ئەوەی وەک کوڕە ھەژارێک ببێتە زاوای سەرۆک ، پەشیمان بوەتەوە.
سەردەشت کاتێک نامەکەی نوسیبو، ئومێدێکی ھەبوو، گۆرانکاری سیاسی، ئابوری، کۆمەڵایەتی، ئازادی بیرورا، لەکوردستان ، ھەنگاوێک بھاوێژێت.
ئەو دەیویست، لەو رێگاوە بە بیر سەرۆک بھێنێتەوە، ئاگای لە ژیانی گەڕەکە ھەژار نشینەکانی ھەولێر ھەیە، یان ئاگای لە و کرێکارانە ھەیە ، لە شێخەلا بە گەرماو سەرما وەک نازم پاڵ بە عەرەبان دەنێن حمالی دەکەن؟
سەردەشت خەونی گەورەی ھەبوو، ئەگەر ببێتە زاوای سەرۆکی ئەوکات، دیوەخانانەی خێڵ و ئاغاکان دەبرێت و دابەشی دەکات بەسەر ھەژاران، دامودەزگاکان بەکەسانی لێھاتو و دور لە ئەندام گیری حزب دەسپێرێت.
سەردەشت ئێستا پەشیمانە لەو نامەیە، نەک لە ترسی خوێن رشتنی بە ناھەق،بەلکو بنەماڵەی سەرۆک ، موچەی فەرمانبەر و بێوەژن و کەم ئەندامیان بری و قاسەی ژێر زەمینەکانیان پڕکرد.
ئەو ناوێت ببێتە زاوای کەسێک ، سەدان پێشمەرگەی دابە کوشت بەناوی شەڕی تیرۆر ، کەچی نەوەکانی لەژێرەوە لەگەڵ داعش خەریکی بازرگانی نەوت بون،سەردەشت ناوێت ببێتە زاوای کەسێک نەوەکانی بازرگانی مادەی بەسەرچوو بکەن و کۆمەلگا نەخۆش بخەن.
سەردەشت ھەمیشە زیندوە، بەزیندوی دەمێنێتەوە ،ئەو کۆتا رۆژنامەنوس نیە بە فیشەکی جەلادەکان تیرۆر کرابێت،چونکە جەلادەکان میلی تفەنگەکانیان ھەمیشە لەپێشە بۆ لە ناوبردنی دەنگی ئازاد.