پـارتـــی شـــــــــــپرزە……. هــەڕەشـــە دەکـــات

تــاهــــــیر حەســــــــەن:

ڕۆژی 13ی ئەم مانگە ، واتە دوای تێپەڕبوونی 9 ڕۆژ بەسەر کارەساتی کوشتنی عەمدی (سەردەشت عوسمان) دا. مەکتەبی سیاسی پارتی بەیاننامەیەکی خوێناوی دەرکرد. سیمای بەرجەستەی ئەو بەیانە ، وێڕای فتوای قەتڵ و هەڕەشەی دەست بڕینەوە و شمشێربادان.

سەرتاپا شپرزەیی و دەستوپێ وونکردن و هستریای مەکتەبی سیاسی پارتی لەبەرامبەر جەماوەری بەدەنگهاتووی کوردستاندا نیشان دەدات. هەر بۆیە بەیانەکە کەوتۆتە تۆپبارانێکی بێ ڕەسەدو کوێرانە بەهەموولایەکدا.

ئەگەر ئەو بەیاننامەیەی مەکتەبی سیاسی پارتی تەرجەمەی زمانەکانی ئینگلیزی و فەرەنسی و ئەڵمانی بکرێت و فرسەتی ئەوە هەڵکەوێت لە پەرلەمانی ئەوروپا بیخوێنیتەوە، یان بینێریت بۆ ڕۆژنامەی وەک (نیۆیۆرک تایمز) یان (واشینگتۆن پۆست) یان (گاردیان) ، وبە سەرنووسەری ئەو ڕۆژنامانە یان ئەندامانی پەرلەمان نەڵێی ئەوە بەیانی مەکتەبی سیاسی پارتی دیموکراتی کوردستانە، کە سەرۆکەکەی ناوی سەرۆکی هەڵبژێردراوی هەرێمی کوردستانی لەخۆی ناوە!. هەموو وادەزانن ئەو بەیانی دەست و قاچ پەڕاندنە بەیانی بزووتنەوەی تاڵیبانی ئەفغانیە. سەرنج بدەنە ئەم قسانە: (…جائەگەر زوو دەستی ڕەشی نەگریسیان نەبڕینەوە. …. بەو تاقمە گێرەشێوێنە تاوانکارەش ڕادەگەیەنین، کە ئەوان لای ئێمە ناسراون و سەرەداوەکانی پیلانەکەیان و ئامانجەکانیان ئاشکرا بووە…!!) .

ئەگەر بەڕاستی دەزگایەکی یاسادانان لە کوردستان هەیەو ناوی پەرلەمانە ؟، ئەگەر بە ڕاستی دەزگایەکی بەڕێوەبردن لە کوردستان هەیەو ناوی حکومەت و ئەنجومەنی وەزیرانی کوردستانە؟ . چۆن دەکرێ حزبێک بەبەیاننامەیەک و بەپێشچاوی حکومەتەوە ئەم هەموو هەڕەشەی کوشتن و دەست و پێ قرتاندنانە بکات و کەسیش نەبێت بڵێ پشتی چاوت برۆیە!. لەهەر ووڵاتێکدا کە لەلانی کەمی ستانداردی حکومەت و پەرلەمانی ئەم سەردەمە بەهرەمەند بێت، بڵاوکردنەوەی بەیانێکی وەک ئەوەی مەکتەبی سیاسی پارتی، بەسە بۆ ئەوەی دەوڵەت ئەو حزبە لە لیستی ئەحزابی قەدەغەکراودا تۆمار بکات. چ جای ئەوەی سەرۆکەکەی سەرۆکی ووڵات بێت !!.

بەیاننامەکەی مەکتەبی سیاسی پارتی هەوڵدانە بۆ ڕەنگڕشتنی ئاشووبێک لە کوردستان، کە چەند ڕۆژێکە تەواوی بڵاوکراوەکان و کەناڵەئاسمانیەکانی پارتی و مووچەخۆرەکانی یەکێتی قووتابیان و ڕۆژنامەنووسەکانیان لە میدیاکانیانەوە سەرقاڵین. پارتی ئاگاهانەو ئامانجدارانە دەیەوێت سەرنجی خەڵکی کوردستان لەسەر خوێنی ڕۆژنامەنووس (سەردەشت عوسمان) و مەسەلەی ئازادی بگوێزێتەوە وئاشووبی تێکهەڵچوونی سۆرانی و بادینی و هەولێری و سلێمانی لە جێگای بخوڵقێنێ. بۆ ئەمە ئاگاهانە تێدەکۆشێ تەواوی خرۆشانەجەماوەریەکانی کوردستان و دەرەوە لەدژی تیرۆری ( سەردەشت عوسمان) بدات بە ملی بزووتنەوەی (گۆڕان) داو، خۆی لەخواستی جەماوەری بەگیانهاتووی خەڵکی کوردستان بدزێتەوە. خۆ کەڕکردنی بزووتنەوەی (گۆڕان) یش ئەوەیە، کە دەزانێت بەهەر حاڵ سبەینێ دەبێ ئەندامەکانی بچنەوە هۆڵی پەرلەمان وسەرئەنجام مووچە و بودجەو نەسریەی حزبەکەیان لە پارتی وەربگرن. ناکرێ لەسەر خوێنی ڕۆژنامە نووسان پارتی زۆر زوویر بکەن لە خۆیان!.

ڕیشەی پایەی ماددی و کۆمەڵایەتی هاتنەمەیدانی خەڵکی کوردستان لە جێگەیەکی تردایە، ئەم هاتنە مەیدان و بەخۆداهاتنەی کۆمەڵگە، کە هەرجارەی لە دەوری مەسەلەیەکی دیاریکراو تەوەرە دەبەستێ، لەخۆوە و کتوپڕ نیە. ئەم خەباتە مێژوویەکی هەیە، خاوەنی قوربانی ئێجگار قوورسە، چەندین جار کەوتووەو هەستاوەتەوە، چەندین جار خامۆشکراوە و پشتی ڕاستکردۆتەوە، چەندین جارسەری لێتێکدراوەو خۆشخەیاڵ کراوە. بەڵام هەتا هاتووە ئەزموونی زیاتری پشتسەر ناوەو بەرچاوی ڕۆشنتر بووە. بەڵام هیچ کەسولایەنێک نەیخوڵقاندووە. ئەگەر مەکتەبی سیاسی پارتی یان هەر کەسێکی تر لەو باوەڕدا بێت ، کە بەکردەوەی سیاسی دەرهێنانی کۆمەڵگە بۆ هەر مەسەلەیەک کەوتۆتە سەر میزاج و حەزو ئارەزوو، یان قازانجی هەر حزب و لایەنێک و هەرکاتێک مەبەستی بوو دەتوانێت ئەو پلاکە داگیرسێنێت، ئەوا یان بێئاگایی خۆی لە سیاسەت و قانوونمەندی بەڕێوەچوونی کۆمەڵگە نیشان دەدات، یان مەبەستیەتی بەزۆر بیخاتە خانەیەکەوە کە خۆی دەیەوێ.

شۆڕش ، خۆپیشاندان، مانگرتن، یاخیبوون، هەموویان میکانیزمی کۆمەڵایەتی بەرەوپێشەوەچوونی کۆمەڵگەی چینایەتین بۆ گۆڕین. هیچ کەس و تاقمێک ناتوانێت بیانخوڵقێنێت یان بەرپایان بکات. ئەحزابی سیاسی جۆراوجۆر دەتوانن کاریگەریان لەسەر ئاسۆی بەڕێوەچوونیەوە هەبێت، بەڵام ناتوانن دروستی بکەن. کۆمەڵگەیەک ئامادەی هاتنەمەیدان و کردەوەی سیاسی و کۆمەڵایەتی نەبێت، کەس ناتوانێت بەزۆر بیهێنێتە مەیدان . کۆمەڵگەی کوردستانیش وەک کۆمەڵگەیەکی چینایەتی هاوچەرخ لەم ڕێسایە بەدەر نیە.

مێژووی زیاتر لە نیوسەدەی ژیانی خەڵکی کوردستان تا بەر لە ڕاپەڕینی ئازاری 1991 سەرتاپا کوشتارو ئەنفال وکیمیاباران وڕاگواستن وئیعدام وگوولەباران وشەڕو زیندان وئەشکەنجەو سەرکوت بووە بەدەست ڕژێمی بۆرژوا فاشستی بەعسەوە. وا زیاتر لە 19ساڵیشە ژیانی خەڵکی کوردستان بە دەست دوو تاقمی میلیشیای تفەنگچی بۆرژوا ناسیونالیزمی کوردیەوە دەناڵێنێ. دزی وتاڵانی و گەندەڵی و ڕاووڕووت و فەسادی ئیداری، بێحکومەتی وبێ قانوونی، سەرگەردانی سیاسی ونەبوونی ناسنامەی ووڵاتی، کۆشکی شاهانە بۆ خۆیان و دەستوپێوەندەکانیان و ژیانی دەستتەنگ وتەحقیر ئامێز بۆبەشی هەرە زۆری دانیشتوان. سەرکوت و ڕاوەدوونان و هەڕەشەی نانبڕین و تەقەلەخۆپیشاندەران، کوشتنی نامووسی سەدان هەزار ژن، دزین وتیرۆری ڕۆژنامەنووسان، لەپەراوێزی سیاسەتدا ڕاگرتنی خەڵک وبازرگانی حزبی بە چارەنووسی خەڵک وکۆمەڵگەوە ، هەموو ئەمانە سیمای تراژیدی ژیانی زیاتر لە 19ساڵی خەڵکی کوردستانە. خەڵکی ئیتر دەیەوێ ئەم تراژیدیایە بگۆڕێ، خەڵکی ئیتر ئەم دەسەڵاتەی ناوێ. خەڵک عەدالەتی کۆمەڵایەتیان دەوێ، قانوونی ئینسانی و دەسەڵات وحکومەتی هەڵبژێردراوی دوور لە هەڕەشەی چەک ونانبڕینیان دەوێ، دابەشکردنی وەک یەکی سەروەتوسامانی کۆمەڵگەیان دەوێ، ئازادی بێقەیدو شەرتی سیاسی وڕۆژنامەگەری و بیروڕاو عەقیدەیان دەوێ، ژیانێکی شایستەی ئینسانی ئەم سەردەمەیان دەوێ. ئیتر هەڵڕشتنی فەردە پێڵاوی لاستیک کە دەسەڵات دەڵێ بەشاخەوە دڕاندوومانە ناتوانێت نیوەی دانیشتوانی کوردستان کە لاوانن بخەڵەتێنێ. ئێمە زۆر زوو ووتمان، ئەگەر کابووسی هەڕەشەی هەموو ڕۆژەی گەڕانەوەی ڕژێمی بەعس بۆ کوردستان بەسەر سەری خەڵکی کوردستانەوە نەمێنێ، خەڵکی مۆدێرن و غەربی کوردستان ناتوانن دەسەڵاتی جەماعەتێک عەشایەری تفەنگچی کە بەزۆری چەک وگووللە خۆیان بەسەر کۆمەڵگەدا سەپاندووە، قبووڵ بکەن. داواکردنی خەڵک بۆ وەرگرتنەوەی خوێنی سەردەشت عوسمانەکان تەنیا ئەمە بنەما کۆمەڵایەتیەکەیەتی نەک هیچ شتێکی تر. ئەوەی کە پارتی ئاگاهانە دەیەوێ تەواوی ئەم دیاردە سیاسی وکۆمەڵایەتیە بدات بە ملی (گۆڕان)دا، ئەمە لەلایەکەوە هەوڵێکە بۆ بچوک نیشاندانی هاتنەمەیدانی خەڵکی کوردستان، و بوارکردنەوەی بۆدەستوپێ قرتاندنی ناڕەزایەتی خەڵک لەلایەکی ترەوە. وەک ڕۆژی ڕووناک دیارەو هیچ بەڵگەهێنانەوەیەکی ناوێ، بزووتنەوەی (گۆڕان) یش هەتا ئەو ئاستە لەگەڵ ناڕەزایەتی خەڵکدا دەبێت، کە تۆزێک فشاری پارتی لەسەر هەڵسوڕانی ڕەوتەکەی لە ناوچەکانی ژێر دەسەڵاتی پارتیدا لەسەر خۆی کەم بکاتەوە. دەنا ئەویش سەرئەنجام وەک ڕەوتێکی بۆرژوا ناسیونالیزمی کورد دەچنەوە نێو کاسەی یەک بزووتنەوە کەپارتی ویەکێتی نوێنەرایەتی دەکەن.

هاوسۆزی و هاوخەباتی و بەدەنگەوەهاتنی خەڵکی شارو شارۆچکەکانی کوردستان، لەسلێمانی و چەمچەماڵ و گەرمیان و هەڵەبجەو ڕانیەو قەڵادزە وە تا هەولێرو ناوچەکانی دەوروبەری ، چاو بەفرمێسک و دەست لەسەر دڵ و دەست لەنێو دەستی شارو شارۆچکەکانی کوردستان ، گەرووی هاوار بەیەک تێکەڵکردنی خەڵک لە دەرەوەو ناوەوەی کوردستان بۆ ئازادی و ئاشکراکردنی تیرۆریستان، زۆر لەوە تۆکمەتر و مەحکەمتر خۆی نیشانداوە، کە بتوانرێت بە پیلانی منداڵانەی سۆرانی و بادینی و هەولێرو سلێمانی، ڕیزەکانی خەڵک شەق بکرێت. هیچ گومانێک لەوەدا نیە، ئەگەر سێبەری سەرکوت لە بادینان کەمتر بوایە شاری دهۆک و زاخۆ و سومێل و ناوچەکانی دەوروبەری شانۆی خۆپیشاندانی دەیان هەزار کەسی وەک هەولێر وسلێمانی دەبوون. ناڕەزایەتی چەندین ساڵەی خەڵکی کوردستان لە دژی تاڵان وبڕۆیی، لەدژی گەندەڵی سیاسی و ئیداری، لەدژی بێ قانوونی و بێ حکومەتی، لەدژی تیرۆر و نائەمنی و کوشتارو سەرەتانی شەڕی ناوخۆ و … هیچ کاتێک بەسنووری هیچ شارێکەوە سنووردار نەبووەو تەواوی کوردستانی داگرتووە. هەمووپێکەوە باجەکەیمان داوەو هەمووپێکەوە لە دژی هاتووینەتە مەیدان.

کۆمەڵگەی کوردستان ئیتر بەگیان هاتووەو دەیەوێ پارێزگاری لە ڕۆڵەکانی خۆی بکات. هەر حزبێکیش دەیەوێ گۆشەیەک لە ئینسانیەت و پارێزگاری لە کەرامەتی ئینسانی و مافەخوراوەکانی خەڵکی کوردستاندا لە مێژووی خۆیدا تۆمار بکات، بێ چەند و چوون بێتە پەنای جەماوەری ناڕازی و هەقخوازی خەڵکی کوردستانەوە.

پارتی مولزەمە تیرۆریستان تەسلیم بە دادگای ئاشکراو بێلایەن بکات و سەر بۆ خواستی ملیۆنی خەڵکی کوردستان بە ئازادی بێقەیدوشەرتی سیاسی، ئازادی عەقیدەو ئەندێشە، ئازادی ڕۆژنامەگەری و هەڵسوڕانی سیاسی دابنەوێنێ و پێشێلی نەکات.

17 ئایاری 2010