بۆ خاوەن شکۆکانی وڵات !!!

دوای دوو ساڵ لە تیرۆرکردنی هاوڕێی ئازیزمان سەردەشت

بەرهەم خالید: 

خۆزگە لەبری دەسەڵاتدار
هەمووتان بزمار بوونایە
پینەچییەک لە پێڵاوی
منداڵێکی ئەم وڵاتەی بدانایە

خۆزگە لەبری شۆڕشگێڕ
هەمووتان مێشکوژ بوونایە
پیرەمێردێک لە شەوێکی بێ کارەبای گەرمی هاوین
مێشولەی پێ بکوشتنایە

خۆزگە لەبری خەباتگێڕ
دەنکە شقارتە بوونایە
پیرەژنێک لەگوندێکی دوورەدەستی ئەم وڵاتە
چرای پێ دابگیرساندنایە

بەڵام جەخار
نە بزمارو
نە مێشکوژو
نە دەنکەکانی شقارتەن
پێڵاون لە پێی دوژمندان
مێشولەن لەسەر برینمان
ئاگرن بۆ ئایندەمان…….