ئەرسەلان مەحمود:
بێباکییەکەی حیزب و هێزو لایەنە سیاسیەکانی ئەم وڵاتە بەرامبەر بەوەی هەتا ئێرە بەدیهاتووە، بەرامبەر بەوەی هەتا ئێستا قوربانی لەپێناودا دراوە، بەرامبەر بەهەبوونی یەکتری، ئەوەتا هەبوونە جڤاکییەکەی بەمانای وشە، یانی بەهەموو ماناکانییەوە، بردوەتە ژێر پرسیارو مەترسیەکانی لەناو چوونەوەو، تەموومژاویکردوە!
ئێستا لەم وڵاتەدا، ئێستا لەم بەشە کوردستانە ڕزگارکراوەدا، چاندنی تۆوی باوەڕایی گەوجێنەرو گوێڕایەڵیکردنی کوێرانە، گەواهیدانی درۆزنانە، تۆمەتبارکردنی بێمروەتانە، تۆخکردنەوەی ئەم ڕەنگ و کاڵکردنەوەی ئەو ڕەنگ لەخوێناوی بەقوربانیکراوو قوربانیدەردا، تەنها لەپێناو سڕینەوەی یەکتریدا، تەنها لەپێناو ڕەوایەتیدان بەناڕەوایەتیدا، تەنها لەپێناو جێپێکردنەوەی خودو شوێنپێکاڵکردنەوەی ئەودا، بووە بەشای هەموو شتێک!
چەند بەرزە فڕن ئەو مرۆڤانەی لەپێناو هێنانە ئاراوەی ژیانێکی باشتر، هەبوونێکی شایستەتردا، شەهید دەبن، چەند نەمرن ئەو مرۆڤانەی بەزیندویی دێنە دنیاوەو، هەر بەزیندویش دەمرن، بەڵام بەداخەوە، بێباکی حیزب و هێزو لایەنە سیاسییەکانی ئەم وڵاتە بەرامبەر بەخەون و خەمە جڤاکییەکە، ئەوەندە ئاست نزمە، وایکردوە تاکە خاوەن نەخشەکان، وایکردوە نووسەرو ڕۆژنامەوان و مەخلوقە ئازادیخوازەکان، لانیکەم وەها شەرەفێکیان بەبەردا نەبڕێت، وایکردوە باوەڕی لایەنداری لەعەقڵگەرایی باڵاتر ببیندرێت، وایکردوە ژانی لەدایکبوونی عەقڵ و عەقڵانیەت، لەژێر پرسیارو مەترسیەکانی لەبار چووندا، وەک هەمیشە لەچەمک و فۆڕمی جیاوازدا خۆی وێنا بکاتەوەو بناڵێنێت!
عبدالستار، سۆرانی مامە حەمە، سەردەشت عوسمان، کاوە گەرمیانی و، هەموو ئەوانەی ڕفێندران، هەموو ئەوانەی بێسەرو شوێنکران، هەموو ئەوانەی سنوردارو زیندانی و غەڕامەو ئازار دران، ئامانجی وەها بێباکییەک بوون بەرامبەر بەکەوڵکردنی یەکترو ساغکردنەوەی ململانێکانی نێوان حیزب و هێزو لایەنە سیاسیەکانی ئەم وڵاتە، نەک قوربانی ڕوانگەو هزرو کاریگەری پێگەو توانستەکانی پیشەگەرییان.
ئەمە لەکاتێکدایە، هەر یەک لەحیزب و هێزو لایەنە سیاسیەکانی کوردستان، لەوپەڕی ڕاستیانەوە تا ئەوپەڕی چەپ، ڕۆژانە تەبلیغاتی ئەوە دەکەن، مافێکی بنەڕەتی مرۆیی و سروشتیە، هەر مرۆڤێک بییەوێ بەپێی خودی باوەڕەکانی خۆی، ژیانبکاو ئەزموون بکات، بەدڵنیاییەوە، سەپاندنی هیچ شێک بەشێک نییە لەماف و ئەرک، بەڵکو ئەوە ویستی ئازادە بەرەو کەمالیەتمان دەبات، نەک ترس و تۆقاندن و تیرۆرو بڵاوپێکردنی هزری گەوجاندن و، دیماگۆجییەت.
بەڵام ئەوەتا لەسایەی ئەم ڕەوشە بێباکییە تەژی لەغەوشەی تەواوی ئەم حیزب و هێزو لایەنە سیاسیانەدا، دەیانساڵە بەدەیان نووسەرو بەدەیان ڕۆژنامەوان و بەدەیان خەڵکانی خاوەن نەخش، دەترسێندرێن، زیندانی و بێسەرو شوێن و تیرۆر دەکرێن، بەتەنها لەپێناو بەلادابردنی ململانێ حیزبییەکانی نێوانیان، ئەوەتا دەیانکەنە ئامانج، سەرئەنجامیش زەرەرمەندە یەکەمەکە بەتەنها هەر بەقوربانیکراوەکەو، قوربانیدەرەکەی لێکەوتووەتەوەو لێدەکەوێتەوە.
بۆچی؟، چونکە دروست دۆسییەی بەقوربانیکراوەکە، بەحیزبی و بەسیاسی کراوەو، دەکرێت، هەرگیز دەرفەتی ئەوە لەبەردەمی دۆسیەکاندا ناهێڵنەوە، تا ڕەوتە ئاسایی و یاساییەکەی خۆی بگرێت. لەبە ئەوە ئەگەر خانەوادەو خەڵکانی مەدەنی و ئازادیخوازانی ئەم وڵاتە، وەک ئەوەی پێویستە نەیەنە سەر هەست جوڵاندنی خەڵک، تا بەر بەوەها هەمەکییەت و بێباکییەک بگرن، ئەوە بەدڵنیاییەوە، دۆسیەی ڕۆژنامەوانە تیرۆرکراوو جوانمەرگکراوەکەی گەرمیانیش”کاوە گەرمیانی” بەهەمان ئەو دەردەی ئەوانی دی دەبردرێت. چونکە بەتەجروبە دەرکەوتووە، بەسیاسیکردنی دۆسییەی ڕۆژنامەوانە زوڵملێکراوەکانی رابردو، دواینجار هێندەی دۆسییەکانی ئەوانی دیزە بەدەر خۆنەکرد، ئەوەندە نەیتوانی بیانگەیەنەتە ئەنجام و ساغکردنەوە.
بەڵایە سەدای دەنگ، کوشندەیە ناونیشان، بێئەوەی بەخۆتبزانی، بێباکی دەتکاتە ئامانجی بەلادابرنی ململانێیە حیزبییەکان، لێرە وایە، ناونیشانێک دەپوکێننەوە تا بێناوێک شکۆفە بکات، سەدایەک دەبێ بخنکێت تا نەشازێک ببێت بەجێگرەوە، لەبەر ئەوە، بەحیزب و سیاسیکردنی هەر دۆسییەکی وەها، جا لەلایەن هەر حیزب و هێزو لایەنێکی سیاسییەوە بێ، تەنها لەپێناو بەدیهێنانی ئامانجێکی دیاریکراودایەو، بەر لەهەر شتێک دەچێتە خانەی تیرۆرکردنی حەقیقەتەوە.
سەرنجبدەن، ئەم هەموو کوشتارەی بەناوی ” ئازادی، شەرەف، پارە ” لەم وڵاتەدا خەریکە دەبێ بەدیاردەیەکی بەرپێنەگیراو، ئەرێ ئایا نیشانەی ئەوەیە ئەم میللەتە لەبنەمادا ئەوەندە بەر بادو بەربەری و ماددییە؟، ئەرێ ئایا وەها کوشتارگەیەک دەرئەنجامی نائاگامەندی و نالێبوردەیی و ناشکۆمەندی ئەم میللەتەیە؟، یان لەبنەمادا، دەرهاویشتەی سەرئەنجامی مفرەداتی فورسەتبازی ئۆینبازە بێباکەکانی ئەم وڵاتەیە وایکردوە خەڵک ناچار بەشێوە ڕەفتارێک بکرێ، ئەسڵەن خۆی هەڵینەبژاردوەو، ڕەنگکراوە، میڵتۆن دەڵێت” ئازادی باشترین قوتابخانەی فەزیلەتە.” بەڵام فەزیلەت تەنها کاتێک ڕاست و چاکە ئەگەر ئازادانە هەڵبژێردرابێت، ئەگەر لەدەرەوەی ویستەکانی خۆی، ڕەنگنەکرابێت.
حیزب لەدەرەوەی پڕۆگرامە فەرمییە ڕاگەیەندراوەکەی خۆی، ئەگەر وەک تاکتیکێکی ئانی یا ستراتیژیش بێت، مافی ئەوەی نییە چیپێخۆش بێت ئەوە بکات، هەروەک ئەوەی ئەمە سەبارەت بەحکومەتیش هەر ڕاستە، ئەویش ئازاد نییە لەدەرەوەی سیستەمی بڕیارلێدراوی حکومڕانێتیدا، چیپێخۆش بێت ئەوە بکات، تەنانەت ئەگەر ئەو شتە ببێتە مایەی هێنانە ئاراوەی هەبوونێکی شایستەتریش، ئەگەر بەر لەوە هەم پڕۆگرامە حیزبییەکەو هەم دەستورە حکومڕانێتیەکەیش پێویستییان بەهەمووارکردنەوەو، گونجاندنەوەی هەبێ، ئەوە دواینجار رێسایەک هەیە، ڕێسای سروشت، ئەو وەک حوکمێکی هەتاهەتایی بۆ هەموو مرۆڤەکان و، یاسادانەران و هەروەها ئەوانی دیکەش دەمێنێتەوە، بەڵام لەکوردستاندا، جگە لەوەی دەستورێکی پەسندکراو نییە، حیزب هەیە واتێدەگا، ئەوەی هەیە خۆرسکانە لەژێر دەسەڵاتی ئەودایەو، هەر جۆرە لادانێکیش لەبری ماف، بەدەرچوون لەپرەنسیپە جێگرەکانی خۆی دەبینێت، هەیشە هەر بوارو هەنگاوێک بەئاڕاستەی تەنانەت گەشەکردنیشدا، بکەوێتە دەرەوەی سەرچاوە جێگرەوەکانی پاکێجەکەی خۆی، ڕەتیدەکاتەوە، بەڵام ئەگەر بشلوێت بۆی، بەر لەهەر شتێک لەداگیرکردنی ماڵەکانی خوداو، خوێندنگەو، خانەی خانەوادەکانەو، یاریگەو مەلەوانگەکانەوە دەستپێدەکات.
ماوەتەوە بگوترێت، ئێستا پەلاماردانی ” ی.ن.ک ” و، بەرگرتن بەپەرلەمانتارەکانی، دەچنە خانەی وەها بێباکیەتێکەوە، لەکاتێکدا، زەرەرمەندی یەکەم لەتیرۆرکردنی شەهید کاوە گەرمیانی، بەر لەخانەوادەکەی و بەر لەهەر شتێک، خودی یەکێتێی نیشتیمانی کوردستانەو بەر لەهەر لایەن و حیزبێکیش دەبێ “ی.ن.ک” ئەم دۆسییە بەهاوکاری دامەزراوە ئەمنییەکان و خەڵکانی تری ئازادیخواز، ساغبکاتەوەو، وابکا حکومەت بەبێ سڵەمینەوە ئەنجامەکانی بخاتە بەردەم میدیاو خەڵک، ئیدی موزایەدەی هەر هێزو لایەنێک، هات و هاواری هەر تاک و گروپ و کۆمەڵێک، لەدەرەوەی ئەم لۆژیکە، بۆ تیرۆرکردنی ڕاستیەکانە، بۆ ئەوەیە ئەم دۆسییەیەیش وەک دەیەها دۆسییەی تری هاوشێووە، دواینجار نەگاتە دوا وێستگەو هەنگاوەکانی ساغکردنەوە.